Əsas menu

Paşinyan qarşısında “Qarabağ klanı”nı görəcək – ŞƏRH 

Nikol Paşinyan növbədənkənar parlament seçkisi öncəsi “Qarabağ klanını” zəiflətmək xəttini götürməklə doğru strategiya seçdi. Ancaq hədəfi böyütməyə gücü çatmadı. Onun Kollektiv Təhlükəsizlik Müqaviləsi Təşkilatının (KTMT) baş katibini dəyişmək istəyi Moskvanın müqaviməti ilə üzləşdi, üstəlik, məhkəmə eks-prezident Robert Koçaryanı da azad etdi. 

Oxu.Az xəbər verir ki, bunu politoloq Elxan Şahinoğlu deyib.

Onun sözlərinə görə, bundan sonra “Qarabağ klanı” və Ermənistandakı ruspərəst qüvvələr Paşinyana qarşı birləşəcəklər. “Lider axtarışında isə səssiz Serj Sarkisyanın fonunda Robert Koçaryanı seçə bilərlər”, – deyə politoloq əlavə edib. Millət vəkili Eldar İbrahimov hesab edir ki, Paşinyan ona edilən təzyiqlərə tab gətirə bilmədi və geri çəkildi:

“Bir neçə ay öncə qatı cinayətkar, hərbi cani, əli xalqımızın qanına bulaşmış Serj Sarkisyan xuntasını hakimiyyətdən devirərək, onu yerinə keçən Paşinyan “odlu-alovlu” çıxışlarla, reallığa və həqiqətə uyğun gəlməyən, bir çox hallarda isə bir-biri ilə ziddiyyət təşkil edən bəyanatlar verirdi.

Özünü güclü göstərməyə, Ermənistanın tək nicat və xilas yolu olduğunu sübut etməyə, hər kəsi buna inandırmağa çalışırdı. Eyni zamanda, əvvəlki hakimiyyətlərdən də uzağa gedərək, Qarabağ məsələsinin həllində daha qeyri-konstruktiv və dağıdıcı mövqe sərgiləyirdi.

Həmçinin, uzun illər boyu Ermənistana himayədarlıq edənlərə, onu ayaqüstə saxlayanlara, əslində isə for-posta çevirənlərə itaətsizlik göstərməklə, Qərbdəki havadarlarına xoş gəlməyə, ikili oyun oynamağa çalışırdı.

Yəni, eks-prezident, qatı cinayətkar Robert Koçaryanın, digər sabiq prezident Serj Sarkisyanın qardaşı və qardaşı oğlunun həbsi, KTMT-nin baş katibi Yuri Xaçaturovla bağlı və sair addımların atılması Qərbə xoş gəlmək, özü haqda müsbət imic yaratmağa hesablanmışdı.

Amma qısa bir zamanda onun bu addımları əks-reaksiya ilə qarşılandı, Rusiya Paşinyanın bu hərəkətlərinə dözülməyəcəyini xarici işlər naziri səviyyəsində açıq şəkildə ortaya qoymuş oldu.

İlk günlər Paşinyan buna müqavimət göstərməyə çalışsa da, gücü yetmədi, “boyundan böyük işlərə” girişdiyini anlayaraq, geri çəkildi, Koçaryanı həbsdən buraxdırmaq məcburiyyətində qaldı və bununla olan-qalan imicinə də böyük zərbə vurdu. Bundan sonra çətin ki, o, öz imicini, nüfuzunu bərpa edə bilsin.

Əksinə, Koçaryanı həbsdən azad etməklə, özünə qarşı daha böyük cəbhə açmış oldu, yəni, gələcək proseslərdə və seçkilərdə narazı elektorat, “vurulmuşlar”, xüsusilə də illərlə Sarkisyan və Koçaryanın kart kimi istifadə etdikləri “Qarabağ klanı” ona qarşı daha sıx birləşmiş olacaq.

Çox güman ki, onlara artıq qalib durumunda olan Koçaryan başçılıq edəcək. Ancaq istər Ermənistan, istərsə də Paşinyanın tək xilas və nicat yolu Azərbaycanla ədalətli sülh razılığına gəlmək, işğala və təcavüzə son qoymaqdır. Yoxsa, onları hər mənada qara günlər gözləyir”.

Bizimxeber.Az





Cavab ver

Your email address will not be published. Required fields are marked as *

*